ХОМ: УИХ-ын хамгийн "ядуу" гишүүн нь Ж.Батжаргал, хамгийн баян нь Ц.Мөнх-Оргил

Төрийн өндөр дээд албан тушаалтнуудын Хөрөнгө Орлогын Мэдүүлэг(ХОМ)-ээс Улсын Их Хурал (УИХ)-ын гишүүдийн мэдээллийг онцлон танилцуулъя.

Энэ удаагийн парламент одоогоор 73-уулаа танхимдаа сууж буй. Тэдний хамгийн их хөрөнгө, орлоготой буюу баян хүн нь УИХ-ын гишүүн Ц.Мөнх-Оргил байна. Тэрбээр анх 2004 онд УИХ-ын гишүүн болсон бөгөөд өдгөө гурав дахь удаагаа парламентад сонгогчдоо төлөөлөн сууж байна. Түүний нийт хөрөнгө, орлого нь 18.4 тэрбум төгрөг. 

УИХ-ын гишүүн Ц.Мөнх-Оргил нь 

• Хоёр тэрбум төгрөгийн үнэлгээ бүхий орон сууц барилга байгууламжтай
• 170 сая төгрөгийн үнэ бүхий тээврийн хэрэгсэлтэй
• 72 сая төгрөгийн үнэт эдлэл
• 8.3 тэрбум төгрөгийн хадгаламжтай
• 2.3 тэрбум төгрөгийн авлагатай гэх зэргээр 2022 оны ХОМ-ээ гаргажээ.

Харин УИХ-ын хамгийн "ядуу" гишүүн нь Ж.Батжаргал болов. Тэрбээр өөрийнхөө хөрөнгө орлогыг 375 сая төгрөг гэж мэдүүлжээ. Энэ нь өмнөх оноосоо 114 саяар буурсан дүн юм. УИХ-ын гишүүн Ж.Батжаргал нь 

• 110 сая төгрөгийн үнэлгээ бүхий орон сууц барилга байгууламжтай
• 133.9 сая төгрөгийн үнэлгээ бүхий малтай
• 21.2 сая төгрөгийн авлагатай зэргээр ХОМ-ээ гаргасан байна.