Засгийн газраас өргөн барьсан 2023 оны улсын төсвийн тодотголыг УИХ-ын чуулганы нэгдсэн хуралдаан болон байнгын хороонд хэлэлцэж буй.
Ингэхдээ цалин тэтгэвэр, хүүхдийн мөнгө, зорилтот халамжийн тэтгэмж, нийслэлийн түгжрэл гэсэн таван асуудалд нийтдээ нэг их наяд 896,4 тэрбум төгрөгийн тодотгол хийхээр төслөө боловсруулжээ.
Тэгвэл уг хуулийн төсөлтэй холбогдуулан долоон хууль, хоёр тогтоолд өөрчлөлт оруулна гэдгийг УИХ-ын дарга Г.Занданшатар онцолж байв.
Өнөөдрийн УИХ-ын Эдийн засгийн байнгын хорооны хурлаар 2023 оны төсвийн тодотголтой холбогдуулан УИХ-ын гишүүн Ч.Ундрам асуулт асууж, хариулт авав.
УИХ-ын гишүүн Ч.Ундрам: Төр өндөр бүтээмжтэй хэр нь цомхон байх ёстой гэж ярьдаг. Гэтэл төрийн албан хаагчдын тоо 2009 онд 148,000 байсан бол 2021 онд 225,000 болж, 52 хувиар өссөн байна. Энэ хугацаанд манай улсын хүн ам 52 хувиар нэмэгдээгүй. Уг тоонд төрийн өмчит компанид ажилладаг 75,500 хүн ороогүй байгаа. Төсвийн тухай хуулийг дагаж орж ирсэн Төрийн албаны тухай хуульд 2025 он гэхэд Монгол Улсын нийт ажиллах хүчний 15-аас ихгүй хувийг төрийн албанд ажиллуулна гэжээ. Одоо ажиллаж байгаа 225,000 төрийн албан хаагч нийт ажиллах хүчний 16.9 хувь. Тэгэхээр төрийн албан хаагчийг 25,000-аар бууруулах юм байна. Ямар албан хаагчийн тоог багасгах вэ?
Хөдөлмөр, Нийгмийн Хамгааллын Яамны Хөдөлмөрийн харилцааны бодлогын хэрэгжилтийг зохицуулах газрын дарга н.Алимаа: Төрийн албан хаагчдын тоо харьцангуй өсөж байгаа. Засгийн газраас өргөн барьсан уг хуулийн төслийг дагаж орж ирсэн Төрийн албаны тухай хуульд ажиллах хүчний 15 хувьд төрийн албан хаагчийн тоог хүргэнэ гэсэн чиглэл бий. Гэхдээ үүнийг 2025 оноос хойш хэрэгжүүлэхээр төлөвлөсөн.
Энэ хүрээнд үе шаттай ажлууд зохион байгуулахыг Засгийн газрын хэрэг эрхлэх газраас санаачилсан. Тухайлбал тодорхой салбарууд дээр ажлын байрны чиг үүргийн шинжилгээг холбогдох байгууллагууд хийж байгаа. Ингэснээр ажлын байрны давхардал нь юу байна вэ гэдгийн нарийн мэдэх боломжтой. Үүн дээр үндэслэж төрийн албан хаагчийн орон тоог хэрхэн, яаж бууруулах вэ гэдэг нэгдсэн бодлого гарах юм.
